പ്രേക്ഷകരെ ഞെട്ടിച്ചോ? സമ്മിശ്ര പ്രതികരണങ്ങളുമായി കാർത്തിക് ആര്യന്റെ 'ഭൂൽ ഭുലയ്യ 3'

കാര്‍ത്തിക് ആര്യനെ നായകനാക്കി അനീസ് ബസ്‍മി സംവിധാനം ചെയ്ത ഹൊറര്‍ കോമഡി ചിത്രമാണ് 'ഭൂൽ ഭുലയ്യ 3'. ഹൊറർ കോമഡി വിഭാഗത്തിൽ ഒരുങ്ങിയ ചിത്രം ദീപാവലി റിലീസ് ആയി ഇന്ന് തിയേറ്ററിൽ എത്തി. സമ്മിശ്ര പ്രതികരണമാണ് സിനിമക്ക് ലഭിക്കുന്നത്. ചിത്രത്തിലെ ഹ്യൂമർ ഭാഗങ്ങൾ വർക്ക് ആയിട്ടുണ്ടെന്നും വിദ്യ ബാലനും മാധുരി ദീക്ഷിത്തും മികച്ച പ്രകടനമാണ് കാഴ്ച വെച്ചിരിക്കുന്നതെന്നുമാണ് ആദ്യ പ്രതികരണങ്ങൾ.

അതേ സമയം, ചിത്രം പ്രതീക്ഷിച്ച ലെവലിൽ എത്തിയില്ലെന്നും അഭിപ്രായങ്ങളുണ്ട്. രണ്ടാം ഭാഗത്തിലേത് പോലെ ഹൊററും കോമഡിയും മൂന്നാം ഭാഗത്തിൽ വർക്ക് ആയില്ലെന്നും പ്രതികരണങ്ങൾ ഉണ്ട്. മുൻ ഭാഗങ്ങൾ പോലെ ചിത്രത്തിലെ ഗാനങ്ങൾ നന്നായില്ലെന്നും ചിത്രം കണ്ട പ്രേക്ഷകർ എക്സിൽ കുറിക്കുന്നുണ്ട്. എന്തായാലും കഴിഞ്ഞ കുറച്ച് സിനിമകൾ പരാജയപ്പെട്ട കാർത്തിക് ആര്യന്റെ തിരിച്ചുവരവാകും 'ഭൂൽ ഭുലയ്യ 3'.

മാധുരി ദീക്ഷിത്, തൃപ്തി ഡിമ്രി എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. സഞ്ജയ് മിശ്ര, രാജ്പാൽ യാദവ്, അശ്വിനി കൽസേക്കർ, വിജയ് റാസ്, മനീഷ് വാധ്വ, രാജേഷ് ശർമ്മ എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്.

2007ലായിരുന്നു 'ഭൂൽ ഭുലയ്യ' ആദ്യഭാഗം റിലീസ് ചെയ്തത്. മലയാളത്തിൽ സൂപ്പർഹിറ്റായ മണിച്ചിത്രത്താഴിന്റെ റീമേക്കായ സിനിമ പ്രിയദർശനായിരുന്നു സംവിധാനം ചെയ്തത്. ഭൂൽ ഭുലയ്യ വലിയ വിജയമാകുകയും പിൽക്കാലത്ത് ഒരു കൾട്ട് ചിത്രമായി മാറുകയും ചെയ്തിരുന്നു. പിന്നീട് ചിത്രത്തിന് രണ്ടാം ഭാഗം അണിയറപ്രവർത്തകർ ഒരുക്കിയിരുന്നു. 2022ലായിരുന്നു ഇത് എത്തിയത്.

Content Highlights: Bhool Bhulaiyaa 3 receives mixed response after first show